Ganga hart á eftir verktakanum að sýna framfarir
Bæjarstjóri Fjarðabyggðar segir verktaka að byggingu raðhúsa við Skólaveg á Fáskrúðsfirði hafa takmarkaðan tíma til stefnu til að klára húsin. Fleiri áhugasamir bíði.
Húsgrunnarnir við Skólaveg 98-110 hafa staðið hálfkláraðir í nær áratug. Fyrsta skóflustunga að húsunum var tekin sumarið 2006 og þá sögð marka „tímamót í byggingasögu Fáskrúðsfjarðar.“
Þau áttu að vera tilbúin að utan í lok þess árs og fullbúin árið 2007. Verktakinn lenti hins vegar fljótt í vandræðum. Eftir margra ára kyrrstöðu fóru húsin í hendur nýs verktaka en húsin mjakast hægt.
Spurt var út í stöðu framkvæmdanna á íbúafundi á Fáskrúðsfirði í gær. „Það hefur gengið mjög illa að halda verktökunum við þá áætlun sem þeir lögðu fram,“ svaraði Páll Björgvin Guðmundsson, bæjarstjóri.
Hann sagði að þrýst hefði verið á verktakana að ganga betur frá húsunum eftir áramót. Eins hefði verið settur þrýstingur á að öllum teikningum væri skilað inn þar sem húsin hefðu ekki verið fullhönnuð. Vonandi kæmist skriður á verkið með sumrinu.
„Verkið verður tekið af þessum verktökum mjög fljótlega virði þeir ekki þá fresti sem nú hafa verið settir. Það er snúið þegar samningssamband er komið á að stýra verkinu ef menn standa sig ekki en við vonum hið besta.
Það eru aðilar sem hafa áhuga á að koma á eftir þeim enda vantar húsnæði hér. Það er vel rekið á eftir þessu máli.“
