Fimmtungi færri bátar á strandveiðum
Fimmtungi færri bátar stunda strandveiðar á svæði C, frá Þingeyjarsveit til Djúpavogshrepps, heldur en í fyrra. Lægra verð á fiskmörkuðum og meiri eftirspurn eftir vinnuafli í landi eru helstu skýringarnar að mati formanns Landssambands smábátasjómanna.
Í ár hafa alls 120 bátar landað á svæðinu en í fyrra hófu 148 bátar veiðar. Mismunurinn er 28 bátar eða 20%. Sömu sögu er að segja víðar af landinu. Í fyrra stunduðu 664 bátar strandveiðar á landsvísu en 582 hafa veitt í ár sem er um 13% samdráttur.
Axel Helgason, formaður Landssambands smábátasjómanna, segir skýringarnar aðallega felast í lægra verði fyrir afla og góðu atvinnuástandi í landi.
„Verðið er mjög lágt en það lá eiginlega fyrir í upphafi vertíðar. Síðan eru fleiri að átta sig á að menn hafa ekki nógu góða afkomu af veiðunum. Það er mikið af góðum störfum í boði í landi núna. Það er sama hvert maður fer og við hvern maður talar, það er alls staðar erfitt að fá Íslendinga í vinnu.“
Fiskverðið viðkvæmt
Verðið hefur hækkað. Í byrjun síðustu viku var meðalverðið á óslægðum þorski 237 kr/kg, 59 kr. hærra en viku fyrr. Axel segir enga eina skýringu á því hvers vegna fiskverð hafi verið lágt en bendir á að hækkunin kunni að skýrast af minna framboði eftir að lokað var fyrir veiðar á afkastamesta strandveiðasvæðinu. Það geti breyst snarlega aftur. Línubátar sæti færis að fara af stað þegar verðið hækki og afli frá þeim geti aukið framboðið og þar með lækkað verðið á ný.
Þá sé meira um að fiskvinnslur loki einfaldlega yfir sumarmánuðina. „Þær reyna ekki að manna sig með afleysingafólki því það fæst ekki. Þar með minnkar eftirspurnin á fiskmörkuðunum.“
Vilja breyta kerfinu
Austurglugginn/Austurfrétt hefur einnig spurnir af því að eldri veiðimenn treysti sér ekki lengur til veiða í því kerfi sem nú er og nýir sjái ekki hag í að kaupa sig inn í það. Landssambandið hefur til umræðu að reglunum verði breytt og veiðimönnum gefnir fastir dagar til róðra í stað þess að þeir þurfi að keppast um að komast sem fyrst á miðin áður en kvótinn sé uppurinn. Axel segir yfirvöld hafa sýnt þeim tillögum lítinn áhuga.