Bíll brann á Jökudal
Fólksbifreið gjöreyðilagðist eftir að eldur kom upp í henni á þjóðveginum um Jökuldal á sjötta tímanum í dag. Engin slys urðu á fólki.
Kona með tvö börn var í bílnum og kom hún sér og börnunum út þegar hún sá hvað var að gerast.
Atvikið átti sér stað skammt innan við Hofteig og var konan á leiðinni frá Akureyri til Egilsstaða. Útkall barst um klukkan hálf sex og var slökkvilið komið á staðinn um hálftíma síðar.
Vel gekk að slökkva eldinn en bíllinn er gjörónýtur enda varð eldurinn mikill á stuttum tíma.
Hringvegurinn var lokaður í um 20 mínútur meðan eldurinn var sem mestur. Hann var síðan opnaður aftur og gengur umferð um Jökuldalinn eðlilega enda búið að fjarlægja bílinn.
