Bilaður jarðstrengur talin orsök rafmagnsleysis á Breiðdalsvík
Rafmagnslaust hefur verið á Breiðdalsvík og næstu bæjum frá því um klukkan hálf þrjú í dag. Bilun í jarðstreng er talin orsökin.
Um klukkan fimm fengust þær upplýsingar hjá bilanavakt Rarik að vísbendingar hefðu fundist um að jarðstrengur við aðveitustöðina á Ormsstöðum í Breiðdal væri bilaður.
Töluvert verk getur verið að finna bilanir í jarðstrengjum en þá þarf að mæla út hvar nákvæmlega bilunin er.
Viðgerð hefst þegar nákvæm staðsetning bilunarinnar hefur fengist staðfest. Búast má við að hún taki einhverja klukkutíma.
Rafmagnsleysið hefur haft nokkur áhrif á atvinnulífið á Breiðdalsvík þar sem hótel, verslanir og höfnin treysta á rafmagn við starfsemi sína.
