Áhugi á ferð um Gullna hringinn og Austurland að vetri
Seyðfirski ferðaskipuleggjandinn One Stop Shop hefur hafið sölu á vetrarferðum þar sem bæði er farið um lykilstaði á Suðurlandi og Austurlandi. Stjórnandinn segir hugarfarsbreytingar þörf til að selja Austurlandi að vetri til.
„Auðvitað langar okkur að selja lengri ferðir en það virðist taka tíma á svæði sem er ekki nógu þekkt, eins og okkar. Fólk vill tikka í boxin,“ segir ferðaskipuleggjandinn Aðalheiður Borgþórsdóttir sem stendur að baki One Stop Shop.
Í samvinnu við fleiri austfirska ferðaþjónustuaðila hefur Aðalheiður þróað vetrarferð um Austurland sem ein stærsta ferðaskrifstofa landsins, Nordic Visitor, hefur tekið í sölu. Ferðin hefst á tveimur dögum í Reykjavík þar sem Gullni hringurinn er farinn áður en haldið er austur á land þar sem gist er í þrjár nætur áður en gestir halda aftur heim til sín.
Um er að ræða vetrarferð sem í boði verður frá október til desember og febrúar til lok apríl. Hún verður í boði nú í apríl en ekki er reiknað með að reynsla komist á hana fyrr en næsta vetur. Unnið er að því að kynna ferðina fyrir ferðaskrifstofum. „Það er áhugi á ferðinni. Hún þykir spennandi og það er spurt um hana,“ segir Aðalheiður.
Hún segist ekki óttast Fjarðarheiðina enda séu fjallagarparnir í East Highlanders meðal samstarfsaðila og þeir komist flest nema veðrið sé brjálað. Þá hafi innanlandsflug ekki fælt frá ferðinni. „Við settum bara verð á pakkann.“
Hún segir aðra ferðaþjónustuaðila í samstarfinu hafa tekið vel í hugmyndina þegar leitað var eftir samvinnu og vonast til að með þessu eflist enn frekar vetrarferðamennska á Austurlandi.
„Veturinn er mjög spennandi og febrúar er orðinn einn stærsti mánuðurinn í Reykjavík þótt við sjáum það ekki hér. Það þarf ákveðna hugarfarsbreytingu hjá þeim sem selja Austurland. Þótt Fjarðarheiðin sé erfið þá er ekki útilokað að vinna með það.“
