4G samband eflt á Austfjörðum
Bæði Síminn og Vodafone hafa að undanförnu eflt 4G samband sitt á Austfjörðum. Vodafone setti upp nýjan sendi við Vopnafjörð og Síminn hefur uppfært senda sína í 4G+.
Vodafone kom upp 4G í búnaði sendi sínum ofan við kauptúnið í Vopnafirðinum í síðustu viku. Sendirinn þjónar kauptúninu á Tanga og sveitabæjum sem hafa sjónlínu að bænum.
Í tilkynningu Vodafone segir að Vopnfirðingar njóti nú allt að átta sinnum hraðari gagnahraða en áður. Fyrir var langdrægur 4G sendir á Gunnólfsvíkurfjalli sem þjónaði Finnafirði, Þistilfirði og miðunum í kring.
Síminn hefur einnig eflt sitt net. Í vor var komið upp 4G+ sendi við álverið á Reyðarfirði og þar á eftir Stöðvarfirði, Breiðdalsvík og Brekku í Fljótsdal sem þjónar Atlavík og Hallormsstað.
Í samvinnu við Ericsson er verið að færa 4G kerfi símans í 4G+. „Þróun á farsímaneti Símans hefur verið hröð en fyrstu 4G sendarnir náðu 100 Mb/s. Nú styðja allir 150 Mb/s hraða, sumir allt að 225 Mb/s og hafnar eru prófanir á sendum sem ná allt að 300 megabitum hjá Símanum,“ segir Gunnhildur Arna Gunnarsdóttir, upplýsingafulltrúi Símans.