Harma að ekki sé ríkari vilji til að tengja saman byggðir með samgöngubótum
Landshlutasamtök sveitarfélaganna hafa áhyggjur af því að ekki sé veitt meira fjármagni í samgöngur í áætlun fyrir árin 2014-2018 en raun ber vitni. Innanríkisráðherra lagði áætlunina fram á ríkisstjórnarfundi í síðustu viku.Þetta kemur fram í áskorun frá vorfundi framkvæmdastjóra og formanna samtakanna en fulltrúar frá Samtökum sveitarfélaga á Austurlandi sátu fundinn.
Alþingi mun líklega veita afbrigði frá dagskrá til að málið geti fengið meðferð á vorþingi en í ályktuninni er harmað hversu seint það kemur fram.
Vakin er athygli á erfiðri stöðu í samgöngumálum, ekki sé gert ráð fyrir neinum nýframkvæmdum í ár og ekki hafi verið tekið á margra ára uppsöfnuðum skuldavanda í þjónustunni.
Hækkun fjárheimilda til málaflokksins á tímabilinu er óveruleg sem samtökin segja þýða „áframhaldandi ófremdarástand." Niðurstöðunni er lýst sem vonbrigðum þar sem mikilvægu samganga hafi aldrei verið meira.
Bent er á aukna vöruflutninga, fjölgun ferðamanna, stækkun atvinnusvæða og aðgang að heilbrigðisþjónustu í því samhengi.
Sérstaklega er vakin athygli á mikilvægi samgangna fyrir áherslur í byggðaþróun og vísað í stjórnarsáttmála ríkisstjórnarinnar þar sem segir að unnið verði að samgöngubótum með áherslu á tengingu byggða.
„Landshlutasamtökin harma að ekki sé ríkari vilja að finna í samgönguáætlun til næstu fjögurra ára til að ná þessu markmiði.
Óhætt er að fullyrða að enginn einn málaflokkur sé jafn mikilvægur fyrir landsmenn alla. Samtökin skora því á ríkisstjórn og Alþingi að tryggja stóraukið fjármagn til samgöngumála."