Fleiri farþegar með í fyrstu ferð Norrænu en áður
Um 350 farþegar komu með Norrænu til Seyðisfjarðar í morgun í fyrstu farþegaferð ársins. Ferjan er fyrr á ferðinni en áður og fleiri með í fyrstu ferð en áður.„Það stefnir í mikið ár, þetta er töluvert meira en ég hef áður séð með fyrstu ferð," segir Árni Elísson, tollvörður á Seyðisfirði.
Ferjan er einnig viku fyrr á ferðinni en venjulega og hefur ekki áður staðið í farþegaflutningum til Íslands í marsmánuði.
Norræna lagðist að bryggju klukkan níu í morgun með 350 farþega og 80 farartæki, þar af þrjár rútur. Í ljósi versnandi veðurspár seinni partinn hafa flestir farþeganna haldið sig á Seyðisfirði í dag. Rútufarþegarnir hyggja ekki á skoðunarferðir víðar fyrr en á morgun.
En það eru ekki bara rútur fullar af farþegum sem komu í morgun heldur einnig tómar rútur. Algengt er að íslensk rútufyrirtæki flytji nýja bíla til landsins með ferjunni en 5-6 slíkar komu með í morgun.
Eins er töluvert af fragt með ferjunni, bæði til landsins og frá því aftur á morgun en Norræna fer klukkan átta annað kvöld.
